Көрісу күнінде халық қыстан аман-есен шыққанына қуанып, бір-бірімен қол алысып, құшақтасып, ізгі тілектерін білдіреді. Таң сібірлеп атысымен, көрісу мерекесін асыға күтіп отырған әрбір отбасы алдын ала дайындалып қойған дастарханын жаяды. Міндетті түрде бауырсақ пісіріп, дастарханға тәтті-пәттісімен қосып үйіп қояды. Отбасының кішілері үлкендеріне қос қолын беріп, көрісіп шығады. Бір-біріне: «Жасыңа жас қосылып, ғұмырың ұзақ болғай!», «Бір жасыңмен!» дейді. Бұл — «Бір жасқа есеюіңмен! Осы жылға аман-есен жетуіңмен!» деген ізгі тілекті білдіреді.
Содан кейін әр отбасы көршілерімен көріседі. Жасы кіші отбасы мүшелері жасы үлкен жанұяларға кіріп, көрісіп шығады. Дәстүр бойынша әр адам кемінде үш үйдің есігін ашуы керек, яғни түске дейін үш үйге кіріп, көрісіп үлгеруі қажет. Бұл жоралғы — жыл бойы балаларымыз тоқ жүрсін, дастарханымыз аралас болсын, қарым-қатынасымызға сызат түспесін деген ниеттен туған.
Тарихи тұрғыдан алғанда, мерекенің шығу тегі қазақ халқының көшпелі өмір салтымен, әртүрлі қоныстану орындарымен және көктемнің өңірлерге келу мерзімдерімен байланысты. Бұрын қыста ауылдар арасындағы байланыс шектеліп отырған. Ал көктемде, қыстаудан жайлауға көшкен кезде, адамдар қайта қауышып, амандық сұрасқан. Сондықтан Көрісу күні — байланыстардың қайта жандануын, бірігуді және өмірдегі жаңа кезеңнің басталуын білдіреді.
Бүгін бұл күн бізге қарым-қатынастың, үлкендерді құрметтеудің және туған-туыстарымызбен, достарымызбен жылы байланысты сақтаудың маңыздылығын еске салады.
Бұл мереке жүректеріңізді қуаныш пен мейірімге толтырсын!
