Алматы қаласында «KazONCO 2025: Онкоурология | Онкогинекология» халықаралық ғылыми-тәжірибелік форумы өтті

20–22 тамыз аралығында Қазақ онкология институты базасында «KazONCO 2025: Онкоурология | Онкогинекология» халықаралық ғылыми-тәжірибелік форумы ұйымдастырылды. Іс-шараға Қазақстан, Түркия, Грузия және Ресейден келген жетекші мамандармен қатар жас дәрігерлер мен резиденттерді қоса алғанда 400-ден астам қатысушы қатысты. Форум бағдарламасына заманауи урологиялық және гинекологиялық ісіктерді диагностикалау мен емдеудің озық әдістеріне арналған баяндамалар мен хирургиялық мастер-кластар енгізілді. Конференция жұмысына қатысқан мамандар:

• Илькер Сельчук, хирург, PhD, доцент, онкогинеколог (Билькент қалалық әйелдер денсаулығы ауруханасы, Анкара, Түркия). Ол «Жатыр мойны обыры кезіндегі жамбас қуысы ағзаларының хирургиялық анатомиясы» және «Жатырдың таралған аналық без обырында бастапқы хирургия немесе неоадъювантты химиотерапия» тақырыптарында баяндама жасады. Мастер-класс аясында лапароскопиялық жүйкені сақтай отырып радикалды гистерэктомия (С1 типі), ICG қолданумен сигналды лимфа түйіндерін анықтау, жамбас лимфодиссекциясы және эндометрий обыры кезінде тоталды гистерэктомия техникасын көрсетті.
• Нұғманов Чингиз Аскарович, андролог-дәрігер, уролог, гениталды хирург («IRM» ЖШС, Алматы). Ол «Радикалды простатэктомиядан кейінгі фаллопротездерді имплантациялау» тақырыбында баяндама жасап, қуық асты безі обыры бар науқастарға фаллопротез имплантациясын көрсету бойынша мастер-класс өткізді.
• Умурзаков Хусан Талипбаевич, MD, PhD, Қазақ онкология институтының онкоурология орталығының жетекшісі (Алматы). «Қазақстан Республикасындағы онкоурологиялық аурулар: эпидемиологиялық бейіні және қазіргі тәжірибедегі аз инвазивті хирургияның рөлі» атты баяндамасын ұсынды. Мастер-класс барысында бүйрек астауы обыры кезінде лимфодиссекциямен лапароскопиялық нефруретэрэктомия жасалды.
• Попов Александр Михайлович, медицина ғылымдарының кандидаты, Ресей онкоурологтар қоғамы (РООУ) басқармасының мүшесі, РООУ өңірлік бөлімшесінің төрағасы, Ресей Федерациясы Президенті Істері басқармасы Орталық мемлекеттік медицина академиясының урология кафедрасының доценті (Мәскеу, Ресей). Ол «Жергілікті таралған қуық асты безі обырында мультидисциплинарлық тәсілдегі андрогендік депривациялық терапияның орны» тақырыбында баяндама жасады.

Форум қорытындысында қатысушылар халықаралық ынтымақтастықтың, тәжірибе алмасудың және денсаулық сақтау практикасына инновациялық технологияларды енгізудің маңыздылығын атап өтті. Әсіресе аз инвазивті хирургияны дамытуға, диагностика әдістерін жетілдіруге және пациенттердің өмір сапасын арттыруға ерекше назар аударылды.